ភ្នំពេញ៖ នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា សម្ដេចតេជោ ហ៊ុន សែន បានថ្លែងថា សន្ដិភាពបានបង្កើតឱកាសមាសសម្រាប់ការអភិវឌ្ឍន៍សង្គម សេដ្ឋកិច្ច និងភាពសុខសាន្តរបស់ប្រជាជនកម្ពុជា ៤៤ឆ្នាំមកហើយ ដែលត្រូវតែរក្សាការពារសន្ដិភាពពីពេលនេះតទៅមុខទៀត។
ថ្លែងក្នុងពិធីមីទ្ទីងរំឮកខួបលើកទី៤៤ នៃទិវាជ័យជម្នះ ៧ មករា ឆ្នាំ២០២៣ សម្ដេចតេជោ ហ៊ុន សែន បានលើកឡើងថា ៤៤ឆ្នាំហើយដែលសន្ដិភាពបានរួមចំណែកដល់ការអភិវឌ្ឍ និងការរីកចម្រើនរបស់កម្ពុជា។ បើទោះបីកម្ពុជាប្រឈមនឹងវិបត្តិកូវីដ-១៩ក្ដី និងទទួលរងនូវឥទ្ធិពលពីវិបត្តិស្មុគស្មាញនៃសភាពការណ៍អន្តរជាតិក្ដី តែសន្ដិភាពនៅតែរក្សាបានដែលជាមូលដ្ឋាននៃភាពសុខដុមរមនារបស់ប្រជាជន។
សម្ដេចថា៖ «ពាក្យស្លោក អរគុណសន្ដិភាព អរគុណនយោបាយឈ្នះ ឈ្នះ បានលាន់រន្ទឺរពាសពេញប្រទេស និងបានក្លាយជាស្មារតីនៃសង្គមជាតិដ៏ខ្លាំងក្លារស់រវើកក្នុងដំណើរកសាង និងការពារមាតុភូមិ។ បើយើងរក្សាសន្ដិភាពមិនបាន យើងពិតជាមិនអាចទទួលសមិទ្ធផលគ្រប់យ៉ាងនៅថ្ងៃនេះបានឡើយ»។
ការក្សាបាននូវសន្ដិភាពនេះហើយបានធ្វើឱ្យកម្ពុជារក្សាបាននូវលំនឹងសេដ្ឋកិច្ច កាត់បន្ថយភាពក្រីក្រ រដ្ឋមានលទ្ធភាពបង្កើនប្រាក់បៀវត្សជូនមន្ត្រីរាជការ ខណៈរោងចក្រក៏មានលទ្ធភាពបង្កើនប្រាក់បៀវត្សជូនដល់កម្មកររបស់ខ្លួន ខណៈកិត្យានុភាពជាតិ លើឆាកអន្តរជាតិក៏ត្រូវបានគេទទួលស្គាល់កាន់តែច្រើនផងដែរ៕
